सलमान खानले गरेको विज्ञापन भ्रामक ? अदालतमा मुद्दा

बलिउड सुपरस्टार सलमान खान फेरि एक पटक कानूनी झमेलामा परेका छन् । पान मसलाको विज्ञापनसँग सम्बन्धित विषयमा उनी अदालतमा तानिएका हुन् । राजस्थानको कोटा उपभोक्ता अदालतले सलमान खानको नाममा नोटिस जारी गरेको छ ।

अभिनेताले प्रचार गरेको पान मसला ब्रान्डको विज्ञापन भ्रामक भएको अनि यसले उपभोक्ताहरूलाई गलत बाटोमा डोराइरहेको आरोप मुद्दामा लगाइएको छ । भारतीय संचारमाध्यामहरुका अनुशार राजस्थान उच्च अदालतका वरिष्ठ अधिवक्ता तथा राजनीतिक नेता इन्दरमोहन सिंह हनीले सलमान खानविरुद्ध उजुरी दर्ता गरेका छन् ।

सलमान खानले प्रचार गरेको कम्पनीले अलैँची र केसर मिसाइएको पान मसला भन्दै आफ्नो उत्पादनको झूटो विज्ञापन गरेको हनीको भनाइ छ । केसरको मूल्यप्रति किलोग्राम लगभग चार लाख रुपैयाँ पर्छ, र पाँच रुपैयाँको थैलीमा यति महँगो उत्पादन कसरी पाउन सकिन्छ ? उजुरीकर्ताले प्रश्न गरेका छन् ।

कोटा उपभोक्ता अदालतले यो उजुरीमाथि संज्ञान लिँदै सलमान र सम्बन्धित कम्पनी दुवैलाई नोटिस पठाएको छ । यस मुद्दाको अर्को सुनुवाइ २०२५ को नोभेम्बर २७ तोकिएको छ । यस्ता विज्ञापनहरूले युवाहरूलाई भ्रमित पार्ने र समाजमा गलत सन्देश पठाउने अदालतमा दायर गरिएको निवेदनमा उल्लेख गरिएको छ ।

‘सलमान खान लाखौँ मानिसहरूका लागि आदर्श हुन् । तर उनले जब कुनै उत्पादनको प्रचार गर्छन्, मानिसहरूले बिना सोच बुझ यसलाई विश्वास गर्छन् । विश्वका धेरै देशहरूमा ठुला फिल्म स्टारहरूले कोल्ड ड्रिंक्सको समेत प्रचार गर्दैनन्, तर हाम्रो देशमा स्टारहरूले पान मसला जस्ता हानिकारक उत्पादनहरूको विज्ञापन गर्छन् ।

उनीहरूले युवाहरूलाई गलत दिशामा लैजानु हुँदैन’ याचिकाकर्ताले भनेका छन् । हनीले एएनआईसँग कुरा गर्दै भनेका छन् , ’सलमान खान करोडौं मानिसका आदर्श हुन्। जब उनले कुनै उत्पादनको प्रचार गर्छन् तब मानिसहरूले बिना कुनै सोचविचार त्यसमा विश्वास गर्छन्।